33 STARBOOKS digi-libraries gihatag sa Inabanga schools

July 1, 2025

by Rey Anthony Chiu

TAGBILARAN CITY, Bohol (PIA) — Katloan ug tulo ka mga computer nga gisudlan sa digitalized library sa science, technology ug innovation ang gi-apod-apud ug gitugyan sa Department of Science and Technology (DOST) ngadto sa tanan nga mga tunghaang elementary ug high school sa Inabanga, aron mapasinati sa lungsod ang sayo nga pag-explore sa kabataan sa pagpangita og kasayuran pinaagi sa research.

Pinaagi sa Science and Technology Academic and Research-Based Openly-Operated KioskS (STARBOOKS) nga programa sa DOST Science and Technology Information Institute, ug sa kasibut sa lungsod sa Inabanga nga abagan ang ilang mga kabtaan aron maengganyo sa pagtuon sa siyensya ug teknolohiya, gipundohan niini ang pagpahimutang sa labing una’ng digital library sa siyensya ug teknolohiya sa nasud sa matag tunghaan sa lunsgod.

Gani, tungod niini, ang Inabanga na ang ikaduha nga lungsod sa Bohol nag nagtanyag sa dugang kahimanan sa pagresearch nga mahimong magamit sa mga kabataan sa mga tunghaan niini, matud ni Vina Antopina, Bohol Provincial Science and Technology Center Manager ug Provincial Director.

Anaa sa STARBOOKs ang online ug offline resource, ug kay ang local government unit (LGU) Inabanga nagpakapin og wireless internet router sa matag computer kiosk, mahimo kini nga ma-akses sa mga kabataan ug mga magtutudlo nga may smart phone aron dungan nga makagamit niini.

“Ang Inabanga una na nga nangandoy nga makahatag sa iyang mga kabataan sa kasaligan nga panginabuhian, ug kini pinaagi sa science and technology,” matud ni Mayor Jose Jono Jumamoy.

Ug kay ang pangandoy nagkinahanglan man sa lig-on nga pundasyon, ang mga kabataan nga anaa sa elementary ug highschool ang ilang gitutokan nga maalagaran sa STARBOOKS aron palamboon ang kaikag alang sa syensya ug teknolohiya.

“Gawas pa, bisan ang mga magtutudlo mahimong kagiyanan sa mga bag-ong teknolohiya nga anaa nasukip sa digital library, kay bisan mga lesson plans ug mnga interactive nga mga topics, makita man didto,” matud ni Engr. Meljun Signe sa DOST Bohol, kinsa maoy nag set-up sa STARBOOKS.

Buot nato nga ipahiluna ang atong mga kabataan sa hayag nga kaugmaon sa science and technology kay mao kini ang kaugmaon sa nasud, ug ang pagpalig-on sa katakus sa kabataan sa science and technology importante alang sa katumanan sa atong damgo,” dayag ni Jumamoy, didto sa turn-over ceremonies sa Inabanga Gym.

Ang Inabanga usab nakapabarug na sa ilang kolehiyo sa lungsod nga nagtutok sa usa lamang ka kurso sa Bachelor of Science in Information Technology, ug ang scholarship niini alang lamang sa seryoso nga mohuman sa kolehiyo.

“Dili daghan ang kwarta sa Inabanga, dili nato pwede usikan ang pundo sa mga mokalit lang og undang sa pag-eskwela, kay nindot ang atong plano sa atong mga graduates,” dugang ni Mayor Jumamoy.

Ug samtang ang ubang lungsod nga nagtukod og mga kolehiyo, nagtanyag sa daghang mga kurso nga kapilian, ang Inabanga mipili sa kurso sa IT apan may mga elective courses sama sa gikaintapan nga Linux Administration, Source Coding ug computer programming, basic Arduino, mga kurso nga may tanyag sa mas daku og swedo.

Ang katumanan hinuon sa ilang mga damgo, magasukad sa kasibut sa kabataan nga palig-onon ang ilang katakus aron makapasar sa libreng kolehiyo nga gilantaw nga makapamaayo sa sitwasyon sa lungsod. (RAHC/PIA Bohol)

Tags: Department of Science and Technology (DOST), STARBOOKS

Source: https://pia.gov.ph/33-starbooks-digi-libraries-gih...