DOST-7, LGU Pinamungajan nagpalig-on sa pagkat-on sa siyensya, gamit ang STARBOOKS

January 20, 2026

by Jositte Ann Tista

CEBU CITY, Cebu (PIA) —Aron mapalig-on ang katakus sa mga magtutudlo ug kabataan sa Pinamungahan, gibansay sa Department of Science and Technology (DOST) Region 7 ang mga magtutudlo sa unom ka mga pampublikong tunghaan sa pagpahimong mas makaagni ang siyensya ug teknolohiya pagpalapad sa kahibalo paggamit sa usa ka offline nga digital library alang sa research, classroom discussions, ug independent learning sa mga estudyante.

Ang pakigtambayayong sa local government unit (LGU) sa Pinamungajan ug sa DOST-7, alang niining programa aron mahatagan og sayon ug kasaligan nga access sa offline digital research materials ang mga magtutuon sa maong lungsod, ilabi na sa mga lugar nga limitado ang internet connectivity.

Ang STARBOOKS o Science and Technology Academic and Research-Based Openly Operated KioskS usa sa mga flagship programs sa DOST nga nagtumong sa pagpasiugda sa kaikag sa pagtuon sa syensya ug teknolohiya sa mga tinun-an.

“This initiative is a meaningful step toward strengthening science learning, supporting teachers, and encouraging curiosity among learners,” matod sa DOST Region 7 sa ilang opisyal nga Facebook page.

(Kini nga inisyatiba usa ka mahinungdanong lakang aron mapalig-on ang pagkat-on sa syensya, masuportahan ang mga magtutudlo, ug mapukaw ang kaikag ug pagkamausisaon sa mga magtutuon.)

Ang STARBOOKS usa ka digital apan offline lamang nga kahinguhaan sa syensya ug teknolohiya, nga gidisenyo alang sa mga komunidad nga limitado o wala gyuy access sa internet.

Aduna kini og computer kiosk o local server nga mahimong ma-access pinaagi sa mga computer sa tunghaan o sa library.

Pinaagi sa STARBOOKS, mahimong mapahimuslan sa mga tinun-an ang basic hangtod sa advanced level nga mga leksyon sa syensya ug matematika, mga reference materials alang sa engineering ug teknolohiya, impormasyon kabahin sa panlawas ug medikal, mga hisgutanon sa agrikultura, pangisda (fisheries), ug food technology. Aduna usab kini mga kahinguhaan kabahin sa panginabuhian, pagnegosyo, ug mga inobasyon.

“With STARBOOKS, schools can access thousands of science and technology publications and learning materials anytime—especially helpful for communities with limited connectivity,” dugang pa sa DOST.

(Pinaagi sa STARBOOKS, adunay access ang mga tunghaan sa liboang mga publikasyon ug learning materials sa syensya ug teknolohiya sa bisan unsang oras—ilabi na nga dako’g tabang alang sa mga komunidad nga limitado ang internet connectivity.)

Sa mga lugar nga walay internet connection, dako ang tabang sa STARBOOKS sa mga magtutuon aron mapalawom ang ilang pagsabot ug mapasiugda ang kaikag sa pagtuon sa syensya.

Gisiguro usab sa gobyerno nga husto ug kasaligan ang tinubdan sa mga impormasyon, ug libre kini nga magamit.

Gi-implementar ang STARBOOKS pinaagi sa DOST–Science and Technology Information Institute (STII).

Sa ilang post, nagpasalamat ang DOST Region 7 sa lungsod sa Pinamungajan sa padayon nga suporta sa maong inisyatiba, nga nagtumong sa paghatag og mas daghang bililhon nga kahinguhaan sa pagkat-on alang sa mga estudyante sa lungsod. (JJT/PIA7)

Source: https://pia.gov.ph/news/dost-7-lgu-pinamungajan-na...